تسويق ولا ترويج ولا إعلان؟
عايز تعمل لنفسك أو لعيادتك تسويق ولا دعايا؟
قبل ما تعمل أي حاجة تعالى نفهم المصطلحات كويس عشان تعرف أنت محتاج ايه ومش محتاج ايه.
التسويق:
هو أوسع مفهوم عندنا وبيتضمن كل خطوات العملية التسويقية من أول تجميع المعلومات اللازمة عن العملاء والشركاء والمنافسين، مروراً بالشريحة المستهدفة والبراند واستراتيجيات التسعير والتوزيع، لحد الخطط التسويقية وتقييم النشاط التسويقي.
بالتالي التسويق أكبر بكتير من باقي المصطلحات اللي هنتكلم عنها.
الترويج:
هو الجزء من العملية التسويقية اللي بنقرر فيه احنا هنتكلم مع العملاء بتوعنا ازاي وفين وهنقولهم ايه.
الترويج بيتضمن أي نشاط بحاول أوصل بيه القيمة اللي أنا بقدمها للعميل بتاعي.
بالتالي الترويج بيتضمن الإعلان والمنشورات الدعائية والتخفيضات والعينات المجانية وحاجات تانية كتير.
الإعلان:
الإعلان هو طريقة من طرق كتير بنستخدمها للترويج، وعشان أعمل إعلان بحدد ٥ حاجات:
- الهدف بتاعي من الإعلان
- الرسالة اللي عايز أوصلها
- الوسيلة اللي هوصل الإعلان من خلالها
- تكلفة الإعلان عليا
- ازاي هقيس نجاح أو فشل الإعلان في تحقيق الهدف
الدعايا:
هي كلمة عامة مش علمية ممكن يبقا ليها معاني كتير.
ممكن تتقال على الإعلانات، وممكن تتقال على المنشورات، وممكن تتقال على الهدايا الصغيرة زي الأقلام والماجات، وممكن تتقال على الرعايات، إلخ.
بعد ما عرفت معاني المصطلحات اللي ناس كتير بتخلط ما بينهم دلوقتي تقدر تقول إنك محتاج كذا لنفسك أو كذا لعيادتك.
تعليقات
إرسال تعليق