خطأ شائع: شرح خواص ومميزات خدمتك باستفاضة
العميل بيشتري الفائدة مش الخاصية.
أولاً يعني ايه الفائدة ويعني ايه الخاصية؟
الخاصية هي ميزة موجودة في الحاجة اللي أنت بتقدمها زي إنك تقول إن الكراون دا زيركونيوم أو السيلر دا resin-based.
الفائدة هي النتيجة الإيجابية العائدة على المريض بسبب الخاصية دي، زي إنك تقول إن الكراون دا بيعيش أكثر أو شكله أحسن، أو السيلر دا بيقفل القنوات بشكل أفضل.
وهكذا.
الفكرة بقا إننا (وأنا كنت على طول بعمل كدا قبل ما أدرس تسويق) بنقعد نعدد في الخواص والمميزات بتاعت الخدمات اللي بنقدمها على أساس نوصّل للعميل الخدمة دي قد ايه حلوة مع إن مش دا اللي العميل عايز يسمعه أو الأحسن إنه يسمعه.
اللي بيشتري بيشتري الفوائد مش بيشتري الخواص.
مثال:
لو أنا اشتريت موبايل بكاميرا حلوة، أنا مش بشتري عدد الميجابكسلز، أنا هدفي الحقيقي واللي مستنيه من الشراء دا هو الصور الحلوة.
لو اشتريت أكلة حلوة من مطعم، أنا مش بشتري مكوناتها أو مقاديرها أو طريقة تقطيعها، أنا في الحقيقة بشتري الانبساط اللي هحسه وأنا باكلها.
هو دا اللي بيخليني أبقا عايز أطلع فلوسي وأشتري الحاجة دي.
بالتالي مهم جداً إنك تبقا قادر تكلم العميل بلغته، وتوصله اللي يهمه، من غير ما تتوهه بتفاصيل كتير هو مش مهتم بيها، عشان في الآخر هو دا اللي هيخليه ياخد منك الخدمة اللي بتقدمها وهو مقتنع ومستريح.
المقولة دي تقريباً أي حد شغال في التسويق عارفها:
Features tell, benefits sell.
أخيراً: لما تيجي تقول الفوائد اللي هتعود على المريض من الخدمة اللي بتقدمها متكدبش ومتبالغش.
احنا نقدر نكون راقيين في أسلوبنا في التسويق وفي نفس الوقت نحقق نتائج كويسة.
في تدوينة تانية إن شاء الله ممكن نتكلم عن طرق الكتابة الإعلانية اللي تخلينا نتكلم مع العميل بلغته ونوصلّه بشكل أحسن.
–
اضغط هنا لمتابعة هذه المدونة ليصلك المحتوى الجديد
انضم إلى مجموعة الإدارة والتسويق لأطباء الأسنان على فيسبوك
–
تعليقات
إرسال تعليق