ازاي تشوف نتيجة التسويق على نفسك أو عيادتك؟

لو بتعمل أي نشاط تسويقي لنفسك أو لعيادتك أو عندك حد بيعملك أي نشاط تسويقي، يبقا مهم جدا ان يكون عندك مقاييس محددة لنجاح أو فشل النشاط التسويقي عشان تعرف انت شغال كويس ولا بتهدر فلوس على الفاضي. 

في أنواع كتير من مقاييس ومؤشرات الأداء ممكن نستعملها، ولكن عشان تحدد المقاييس الصح لازم تشوف ايه نوع النشاط التسويقي اللي أنت بتعمله. 

لو أنت مثلاً بتعمل إعلانات فيسبوك وإنستجرام وعايز تجذب عملاء جدد للعيادة بتاعتك، يبقا أنت محتاج تقيس عدد المرضى الجدد اللي بيجولك كل شهر. 

لو أنت بتحاول تحسن نظام العيادة الداخلي والديكور وتعامل الطاقم مع المرضى وبتقلل وقت الانتظار، يبقا أنت محتاج تقيس مدى رضا المرضى عن السيستم وتجربتهم في العيادة بشكل عام. 

لو أنت بتحاول تحسن من مهارات التقديم والتفاوض بتاعتك بحيث تقلل عدد المرضى اللي بيكشفوا وميجوش تاني، يبقا أنت محتاج تقيس عدد المرضى اللي مش بييجوا تاني بعد الكشف بشكل مستمر. 

دي بعض الأمثلة، ولكن في أي نشاط تسويقي من النشاطات اللي قولناها لو أنت مش محدد مؤشر نجاح أو فشل وبتقيسه بشكل مستمر مش هتقدر تقول وأنت متأكد إنك نجحت أو فشلت في الوصول للهدف من النشاط التسويقي، وبالتالي ممكن جداً بل في الغالب هتكون بتهدر فلوس في الأرض على حاجات مش بتجيب نتائج.

تقييم العمل التسويقي من المهارات الأساسية في التسويق واللي بتوفر عليك فلوس كتير لو استخدمتها صح.