ايه هو التسويق الوارد وليه يهمك كطبيب أسنان؟

لو متردد إنك تعمل إعلانات لنفسك أو لعيادتك على السوشيال ميديا أو بأي طريقة تانية عشان حاسس إن الناس مش هتركز في إعلاناتك زي ما مش بتركز في أي إعلانات، وزي ما أنت نفسك بتعدي أي إعلان يطلعلك على فيسبوك أو يوتيوب، يبقا انت محتاج تتعرف على التسويق الوارد.

التسويق الوارد هو أسلوب جديد للتسويق ظهر مع انتشار استخدام الإنترنت للتسويق، ببساطة معناه إنك تخلي العميل هو اللي يجيلك يشوف ايه اللي عندك بدل ما أنت تعمل إعلانات تقاطع بيها الحاجة الـ هو بيعملها وفي الآخر العميل غالباً مش بيركز فيها. 

طيب ازاي هتخلي العميل هو اللي يجيلك؟ 

عن طريق المحتوى. 

التسويق الوارد هو استخدام محتوى هادف ومفيد للعميل يخليه هو اللي يجيلك بنفسه عشان يشوف المحتوى دا، وساعتها تقدر تعرفه بخدماتك أو منتجاتك من غير ما تبان تقليدي أو تتكلم بنبرة الإعلانات المملة اللي محدش بيركز فيها. 

التسويق الوارد بالذات فعال جداً في المجالات اللي بتعتمد على ثقة العميل فيك، وطب الأسنان بالتأكيد من المجالات دي. 

التسويق الوارد أو الـ Inbound Marketing من المجالات الجديدة نسبياً، عشان كدا الأسلوب دا مش منتشر، لكن اللي بيستخدمه صح بيفرق كتير عن منافسيه في الوصول للعملاء وكسب ثقتهم.